Nuus

GEREFORMEERDE KERK PRETORIA-ANNLIN Nuus   Hier kan u op hoogte gehou word van hierdie jaar se gebeure by GK Pretoria-Annlin! Die gemeente Weekblad en Maandblad is ook hier beskikbaar.  Die-Fontein-Weekblad-5-Julie-2026-WEB Die-Fontein-Maandblad-Junie-2026-WEB Graad 1's 2026 Op 18 Januarie, het drie van ons graad eentjies hul eerste "grootmens" Bybels ontvang. Die Potjiekos-kompetisie ten bate van TOPIA op Saterdag, 14 Februarie 2026.🔥

GEREFORMEERDE KERK PRETORIA-ANNLIN Nuus   Kliek hier vir 2023 Nuus! Dopperspele 2024 Op 11 Mei het die Annlin Doppers saam mede-gelowiges by Dirk Postma skool bymekaar gekom vir 'n dag vol sport-pret en Dopper-gees! Daar was alles gespeel, van Pool tot Pluimbal en ’n uitstekende wen deur die Jukskeispan. So ook het gelowiges mekaar leer ken, verhoudinge gebou en verstek. Ons dank ons Here vir Sy groot genade, dat ons op so besonderse manier Hom kon erken en vir Hom kon leef! Dankie aan al die organiseerders, spanlede en ondersteuners wat saam met ons die dag geniet het. Drie groot cheers vir Annlin! Gemeentekamp 2024 Van boeresport tot kampvuur jolighede, van lag en selfs huil ván die lag - die kerkkamp was volgepak en ons het ons gate uit geniet! Annlin Senior-ontbyt Saterdag, 2 November het die susters vir ons seniors n heerlike ontbyt voorberei! Dankie aan almal wat met al voorbereidings en reëlings gehelp het en die wie saam kom eet het. Belydenis van Geloof en Doop Op Sondagoggend, 12 Mei het Annlin in God se genade gejuig omdat twee lidmate hul geloof in die Here voor die gemeente bely het! Dit was ’n wonderlike voorreg gewees om te sien hoe die Here in elkeen se lewens gewerk het tot die spesiale geleentheid. Dit was ook ‘n besonderse dag gewees want die gemeente het beleef hoe die Here Homself met die een lidmaat en haar gesin verbind deur haar doop en die doop van haar drie seuns. Ons bid die seën van die Here toe vir ons nuwe belydende lidmate! Annlin Seniorete As gelowiges is ons saamgebind in ons geloof in God - ‘n gemeenskap, ‘n gemeente.  Om so deur die Heilige saamgevoeg te wees, kan nie anders as om te lei tot vreugdevolle meelewing en samelewing nie. Dankie aan almal wat kom saam eet het en ook elkeen wat met die voorbereidings gehelp het. Gemeente-Ete Op Sondag, 18 Februarie 2024, het ons die voorreg gehad om Nagmaal saam as gemeente te vier! Na die diens, het ons as Christus se liggaam saam 'n maaltyd geniet. So het ons die Here se genade en liefde beleef.

Sustersaamtrek 2024 https://www.google.com/maps/dir//143+Leonie+St,+Doringkloof,+Centurion,+0157/@-25.851888,28.1224072,12z/data=!4m8!4m7!1m0!1m5!1m1!1s0x1e9564283da138af:0x7d404ad6a77ee448!2m2!1d28.2050307!2d-25.8518806?entry=ttu  Kliek asb hier om die registrasievorm af te laai Neem of stuur asb die ingevulde registrasievorm na suster Clarissa Rehder in die Kerkkantoor

GEREFORMEERDE KERK PRETORIA-ANNLIN Nuus   Weeklikse Gemeente-nuusblad Die Fontein (klik op die foto vir Die Fontein) Kliek hier vir 2022 Nuus Aanbieding oor selfverdediging Die Diakonie het as een van die “Sorg Met Eer”-projekte ‘n selfverdedigingspraatjie aangebied. Die aanbieding is deur br. Barry Mills gedoen en hy het die belangstellendes op ‘n baie insiggewende en praktiese wyse geleer om paraat te wees en om nie ‘n teiken te word vir mense met minder goeie bedoelings nie.  Hy het ook ‘n spons “vyand” saamgebring teen wie daar geoefen kon word. Dit was nogal groot pret. Na die aanbieding is daar lekker gekuier met koffie en beskuit. Daar is hierdie keer R840,00 ingesamel vir “Sorg Met Eer.” Al vier die aanbiedinge van die Diakonie het sover R6110,00 ingebring vir “Sorg Met Eer.” Welgedaan julle! Diakonie praatjie: Vra die dierearts Op 26 Augustus het die Diakonie weer ’n praatjie aangebied ten bate van die Sorg met Eer fonds. Die spreker, oudl. Johan Schoeman, het sy kennis as veearts met ons gedeel en almal se vrae geantwoord. Daar was oor baie dinge gesels - amper alles van snoet tot stert! Dit was ’n wonderlike en insiggewende bespreking gewees. Die geleentheid het R1200 ingesamel vir Sorg met Eer. Baie dankie aan ons spreker en almal wat die geleentheid bygewoon het! Diakens bied werkswinkel aan Ons Diakonie het op Saterdag 20 Mei ‘n werkswinkel in die kerksaal gereël. Die werkswinkel was aangebied deur Diaken Clarissa Rehder en sy het die kuns om boeke te bind en boeke te restoureer aan haar gehoor gedemonstreer. Graad 1 kindertjies kry Bybels Sondag 15 Januarie was 'n groot dag vir ons Gr 1 kinders en hulle ouers. Hulle is almal na vore geroep en ds Giepie en die Gr 1 kategeet, sr Lisa Vosloo het vir elke kind 'n nuwe Bybel geskenk. Mag hierdie kinders, wat nou met hul katkisasie begin, groei in die geloof totdat hulle uiteindelik gereed is om belydenis van hulle geloof af te lê. Jesus sê in Lukas 18:16 "Laat die kindertjies na My toe kom en moet hulle nie verhinder nie, want die koninkryk van God is juis vir mense soos hulle." Skop Nuwe Jaar af met gesellige braai Vroeg in die Nuwe Jaar, op Saterdagaand 14 Januarie, het die gemeente weer kans gekry om bande met mekaar te smee en nuwe lidmate te leer ken. 'n Heerlike braai is gereël deur sr Rita Kruger en die lede van haar span van die Sosiale Kommissie.  Dit was baie gesellig en almal kon van mekaar se slaaie opskep. Dankie Rita en span, dit was puik! Verwelkom die Kurpershoek gesin! Ons gemeente het lekker dubbel feesgevier die afgelope week met die viering van die gemeente se 58ste bestaansjaar saam met Ds Kurpershoek se bevestiging.  Ds. Pieter Kurpershoek is op 14 Oktober 2023 as leeraar van GK Annlin bevestig en is die Kurpershoek-gesin verwelkom in die gemeente. Na die bevestiging en verwelkoming, het die gesellighede na die kerksaal geskuif waar almal jolig saamgekuier en baie lekker geëet het. Uitgestuur op hul sendingreis Op Sondagoggend 25 Junie, net voor die erediens het die gemeente saam gebid en Lied 269 gesing vir ons broeders wat binnekort sou vertrek op hul sendingreis. Net Giepie en Dirk was teenwoordig want ds Danie was nog op pad van Kaapstad af. Heerlike Pretdag Op Saterdag 13 Mei het die Sosiale kommissie vir ons ‘n heerlike pretdag gereël. Na die speletjies en pret het almal heerlik saamgekuier en gesmul aan hul piekniek eetgoed wat hulle saamgebring het. Ons sê baie dankie vir Sr Rita Kruger en die sosiale kommissie vir hulle puik reëlings, asook vir Chris en Hester Kruger wat hulle tyd en toerusting beskikbaar gestel het. Almal moet saamwerk om hierdie lang rubberski te laat vooruitgaan Ses jong lidmate doen belydenis van geloof Ses van ons jong lidmate het verlede Sondag voor die hele gemeente hulle geloof bely. Ons sê vir hierdie groepie en hul ouers baie geluk. Mag julle vashou aan en groei in die geloof en aktief in die gemeente jul lewe toewy aan die Here. Ds Giepie het so mooi die vergelyking getref met Josef wat van 17 jarige ouderdom deur beproewinge heen gegroei het tot ‘n persoon wat as hoof oor die farao se hofhouding ‘n groot rol gespeel het om die Israelitiese volk te bewaar – alles deel van God se voorsienigheid. Senior Ontbyt - 4 November 2023 Saterdag, 4 November het die susters van Annlin ’n wonderlike geleentheid gebied waar “ou” vriende gesellig saam gekuier het en bederf is met ’n heerlike tjop, wors, pap en slaai en dan nog roomys en appeltert uit die boonste rakke! Aan Magda en die span sê ons baie dankie vir die heerlike bederf – julle het julle self oortref. Mosambiekspan terug Met groot dankbaarheid teenoor ons Here het Giepie en Dirk Woensdagaand 12 Julie teruggekeer van Nampula in Noord-Oos Mosambiek. Hulle is by Giepie se huis verwelkom deur hul gesinne. Ons twee sendelinge rapporteer dat die uitreik baie geseënd was. Dit was 'n geloofstap sê Giepie Tydens die geselligheid wat die gemeente gehou het om dankie te sê vir Giepie se dienswerk in die gemeente, het Giepie vir die gemeente vertel dat dit absoluut ‘n geloofstap was. Soos Petrus in opdrag van Jesus op die water begin loop het (Matt 14: 28 & 29) het Giepie ook  vir die Here gevra “Here as dit regtig U is wat my roep, sê vir my dat ek moet kom”. Giepie vertel dat hy daarna uit verskeie oorde bevestiging gekry het.  Ook het Giepie dit baie waardeer dat die gemeente hierdie stap van hom in ‘n mooi en rustige gesindheid aanvaar het, en hom ook daarin ondersteun. Die paar boodskappe van die konsulent en lidmate waar hy bedank is vir sy ywer in die gemeente is afgewissel met pragtige kerkmusiek deur die Viljoen gesin. Giepie aan die woord Na die seremonie in die kerk, het die gemeente uitbeweeg na die saal waar die Kerkraad, die Susters en die Sosiale Kommissie ‘n besondere onthaal gereël het. Verskillende soorte sop en ‘n groot verskeidenheid eetgoed is aangebied.  Die kostafel en nagereg tafel het getuig van groot sorg en fyn smaak. Ons wil graag langs hierdie weg die Kerkraad, die Susters en die Sosiale Kommissie hartlik bedank vir die uitnemende wyse waarop die gemeente hul waardering teenoor Giepie kon betoon. Ons is baie dankbaar dat Giepie, Anneën en hul drie kinders nog steeds in ons gemeente sal aanbly en ons weet dat hulle as lidmate steeds betrokke sal wees by baie aksies. Giepie word ook in ons gebede gedra vir hierdie belangrike roeping wat hy opgevolg het in gehoorsaamheid aan die roepstem van ons God. Gemeente Wegbreeknaweek 2023 - ‘n Saam-met-Mekaar Lewe Die gemeentekamp het op Saterdag 28 Oktober afgeskop toe ’n goeie klompie kampers en dagbesoekers by De Wildt 4×4 bymekaargekom het. Na die ontvangs deur die predikantspaar, het almal gesellig saam verkeer totdat die amptelike program begin het met Skriflesing en gebed deur oudl. Andries Leuschner. Die tema vir die naweek, nl. “Waarom het ons mekaar nodig?” is pragtig voorgedra deur ds. Pieter uit 1 Korintiërs 12 – 14. Die aanbieding het ’n interaktiewe gedeelte ingesluit waar teenwoordiges moes aandui watter deel van die liggaam hulle is. (1 Kor. 12: 15 - 17) Daar was ’n meerderheid “hande” en “voete” wat aangedui het op ons gemeente se bereidheid om vir mekaar te werk. Die aanbieding het afgesluit met ’n gesprek oor die gawes wat die Heilige Gees aan ons saam uitdeel, asook wat dit beteken om prakties saam te ly; en saam bly te wees. Dit was voorwaar ’n heerlike saamwees waartydens ons mekaar beter kon leer ken en so ook dan mekaar se lief en leed kon ervaar Diakonie praatjie: Dwelms en afhanklikheid Ons diakonie het op 22 Julie 2023 'n praatjie aangebied oor afhanklikheidsmiddels op straat. Danie Pelser het die praatjie begin deur ’n oorsig van verskeie dwelmmiddels te gee. Daarna het Hardus Schoeman, wat vir baie jare afhanklikheidsmiddels gebruik het, sy storie vertel en hoe die Here hom van al daardie jare se gebrokenheid gered het. Die geleentheid het ’n opbrengs van meer as R2000 ingebring ten bate van die Sorg met Eer fonds. Dankie ds Attie Tydens ’n middaggeselligheid het ons gemeente op 24 Junie ons waardering in woord en daad uitgespreek teenoor ds Attie Venter. Hy was vir bykans 23 jaar ons herder en leraar. Die verrigtinge in die kerkgebou was in die vorm van ’n spesiale huldeblykprogram en boodskappe van waardering is deur verskeie persone gelewer. Die boodskappe is afgewissel met samesang asook instrumentale uitvoerings deur drie lede van ons orrelis se gesin. Ds Attie het ook ‘n geleentheid gehad om te antwoord en in sy antwoord het hy daarop gewys dat sy hele fokus altyd was om as dienaar van die Here op te tree. Hy het daarop gewys dat hy dikwels net so begeesterd en geseënd van huisbesoeke teruggekeer het en dat dit eintlik is waaroor bediening gaan – om mekaar te bedien. Na afloop van die formele deel van die program het die gemeente na die kerksaal beweeg vir ‘n heerlike warm wintersete saam met Ds Attie en sy gesin. Ons gaan hom mis as predikant, maar ons is dankbaar dat ds Attie in ons gemeente gaan aanbly as lidmaat van ons gemeente.

GEREFORMEERDE KERK PRETORIA-ANNLIN Diensteblad       GEREFORMEERDE KERK PRETORIA-ANNLIN Diensteblad     LIDMATE WAT MEKAAR SE BESIGHEDE ONDERSTEUN ‘n Groot aantal van ons lidmate lewer noodsaaklike dienste - dienste wat van ons ander lidmate weer nodig het.  Die gedagte het ontstaan om hierdie twee groepe by mekaar uit te bring.   Die plan is dus om op ‘n enkele blad al die dienste en die diensverskaffers (ons eie lidmate) met hul kontakbesonderhede te lys en dit te laat druk op stewige papier wat met magneetstroke op elkeen se yskas aangebring kan word. Alternatiewelik kan die inligting op ons jaarprogram aangebring word.  Dit is dan  ‘n manier om mekaar te ondersteun  en in die proses leer ons mekaar beter ken. Die formaat kan moontlik soos volg daar uitsien: Diens Diensverskaffer Tel Nr Epos adres Bv Haarkapster Sr XXXXXXX     Bv Loodgieter Br YYYYYYY     Bv Eiendomsagent Br ZZZZZZZZ     Ens. Ens.       Die sukses van so ’n projek hang grootliks af van ons lidmate se samewerking. Daarom moedig ons u aan om deel te neem en u dienste en kontakbesonderhede deur te gee na die kerkkantoor d.m.v. meegaande skakel. AS U GRAAG U DIENSTE OP DIE DIENSTEBLAD GELYS WIL HÊ, VUL DAN DIE ONDERSTAANDE VORM IN. Van Noemnaam Is u 'n lidmaat van die Gereformeerde Kerk Pretoria-Annlin? Tik "Ja" of "Nee" Tipe diens wat u kan verskaf - bv "elektrisiën" Epos adres Telefoon nommer Kliek in blokkie hieronder indien u goedkeur Kliek in blokkie hieronder indien u goedkeur Gee u hiermee goedkeuring dat u naam, telefoon nommer en epos adres op die diensteblad mag verskyn? Submit

GEREFORMEERDE KERK PRETORIA-ANNLIN Nuus   Weeklikse Gemeente-nuusblad Die Fontein (klik op die foto vir Die Fontein) Kliek hier vir 2021 Nuus Verandering van eredienstye Vanaf die eerste Sondag van 2022 sal die oggend eredienstye verander na 8.30vm . Dit is 'n halfuur vroeër as in die verlede. Dit word so gedoen om ons Engelse broers en susters van Grace Reformed Church Northern Pretoria te akkommodeer. Ons en hulle gebruik dieselfde katkisasielokale net na mekaar. Ons gemeente se katkisasieklasse vind plaas net na die oggend erediens en die gemeente van Grace Reformed Church handel hul katkisasie af voor hul oggend erediens wat om 11vm begin. Met die ekstra halfuur is beide gemeentes in staat om hul katkisasieklasse aan te bied tussen die Afrikaanse en Engelse eredienste. Ons kerk hou kermis Op 12 Maart vanjaar het Annlin weer ’n kermis aangebied. Dit was ‘n wonderlike geleentheid vir saam kuier met 21 stalletjies, almal uitgepak op ons grasperk en inrypad. Daar was hamburgers, worsrolletjies, roosterkoek, kerrie-en-rys, pannekoek, nagereg, koeldranke en ander lekkernye asook mooi items om te koop. Die doel van die kermis was om die gemeente bymekaar te kry en na ‘n lang inperkings tydperk weer bietjie op te vang oor wat alles in die gemeenskap gebeur. Die volgende doel was om geld in te samel vir projekte.  Een so ‘n voorbeeld is die Evangelisasiekommissie se jaarlikse uitreik na ons buurland Mosambiek om daar die Here se woord te gaan verkondig. Almal het dit baie geniet en ons sien uit na 'n volgende kuiergeleentheid. Genotvolle Kerkkamp. Ons ken almal die liedjie “Wat maak ‘n kamp so lekker… dis koffie, pap en wors!”  Nouja, daarvan het ons volop gehad en nog vele meer. Tydens die naweek van 2-4 September het ‘n klompie  lidmate van Gereformeerde kerk Pretoria-Annlin saam gekamp net buite Pretoria by De Wildt. Saterdagoggend het Leanne Venter vir ons onder andere ‘n baie interessante fotovertoning en voordrag gelewer oor haar en Alwyn se werk met die rehabilitering en werk met luiperds in die Magaliesberg omgewing.  Later die oggend het Prof Nico Vorster ‘n praatjie gelewer oor “Wat het jy?” Die vraag het ons weer diep laat nadink oor ons verhouding met God en hoe ons in en buite die gemeente diensbaar behoort te wees. Heerlik saamkuier onder die bome Sondagoggend het ons gedeel in die diens wat elektronies uitgesaai is.  Na ‘n heerlike “brunch” het almal so stadigaan begin oppak en met ‘n trae hart teruggery huis toe. Gesellig rondom die potte in die lapa Ons kan nie anders as om terug te kyk na die naweek met ‘n lekker gevoel van warmte nie.  Nuwe vriendskappe is gevorm, oues is weer versterk en mens kan net hoop dat daar al meer lidmate aan toekomstige kampe sal deelneem. Dankie Rita en jou span.  Julle is staatmakers! Laerskooljeug se Boemelaarsaand Vrydagaand 4 Februarie is ‘n boemelaars-aand vir die laerrskooljeug gehou. Altesaam 27 kinders het opgedaag met hul tente, slaapsakke, bokse, gazebo’s, boemelaargewaad en slaap-goete.  Hulle almal het die oorslaap vreeslik geniet. Die kinders het worsbroodjies geëet en,  gespeel en mekaar beter leer ken. Ds Giepie het ‘n mooi boodskap aan die jongklomp gebring. Voor slapenstyd het hulle wat oorgeslaap het, ook nog lekker fliek gekyk.  Almal wat van hierdie aand 'n sukses gemaak het word hartlik bedank - ook al die ouers wat die kinders gebring het. "Mystery" Aand vir ons Jeug   Ons hoërskool jeug het Saterdagaand 12 Februarie bymekaar gekom vir ‘n aand van misterie, baie lag en heerlik saam kuier. Ons het misdade opgelos, skelms vasgetrek en spioene se identiteite probeer ontrafel. Hulle het lekker saam gebraai en heerlike braaibroodjies geëet. Dankie aan almal wat kom help het, spesiaal aan Ds Giepie, Zoë, Corlien, Marchant, Simon en Jaco en aan elke  tiener wat die aand bygewoon het. "Grot" onder water Die hewige storm wat ons op Vrydag 4 Februarie beleef het, het veroorsaak dat die stoorvertrek onder die saal se verhoog vol water geloop het.  Die water het verlede Maandag enkeldiepte gestaan in die stoorvertrek wat by ons almal bekend is as die “grot”. Die diensgroep vir die 2e handse goedere verkopings stoor die verkoopsware in die grot en aangesien ’n klomp dose met ware op die vloer gestaan het, moes lede van die diensgroep inspring en red wat daar te redde was. Die verkoopsware wat nat geword het, is in die vierkant gesit sodat die son dit kon afdroog. Diensgroeplede het van die klerasie huis toe geneem om te was.  Die waterprobleem is gelukkig betyds hanteer en omtrent al die ware is gered.  Ons wil graag dankie sê vir al die diensgroeplede wat gewillig al hul eie belange eers gelos het om te kom help. Wat beteken dit om deur die Gees te leef? Die tema van die Pinksterfeesviering verlede Saterdag was “wat dit beteken om deur die Gees te leef”. Dit was ’n wonderlike en verrykende byeenkoms. Nadat ds Giepie die verrigtinge geopen het, het hy ds Danie Murray aan die woord gestel en almal het aan sy lippe gehang. Hy het beklemtoon dat alles draai om liefde – liefde tot God en liefde tot jou naaste en dat ons bereid moet wees om ons alles te gee en ons naaste in liefde te dien met ons gawes. Dit is nie maklik en nie altyd lekker nie, maar dit is vervullend want so volg ons Jesus se voorbeeld. Hy het ook uitgewys dat verhoudinge met ons naaste begin in die gesin. Christus se liefde vir sy bruidskerk moet die voorbeeld wees van die man se liefde vir sy vrou en sy kinders. ’n Verdere punt waarop ds Danie klem gelê het is dat ons nie nodig het om sterk te wees nie, want soms gebruik die Here juis ons gebrokenheid om ander mense te bereik.  Wanneer ons in swakheid tot God nader, kan die kragtige werking van Sy Gees ons soms verstom. Na ds Danie klaar gepraat het, het verskeie lede van die Evangelisasiekommissie ’n geleentheid gekry om die gehoor in te lig oor wat tans deur ons gemeente gedoen word in terme van evangelisasie. Ons gemeente se huidige evangelisasie aksies kan in vier groepe opgedeel word, nl:  Evangelisasie in eie omgewing Evangelisasie in omliggende gebiede Evangelisasie in die buiteland Bybelverspreiding Almal het heerlik gesmul aan aan die verversings wat met teepouse saam met die koffie en tee deur ons diakens aangebied is. Die middagete wat deur  lede van die Sosiale Kommissie voorgesit was, was ook sommer uit die boonste rakke. Ons sê graag vir die Diakonie en die Sosiale Kommissie baie dankie. Na middagete het ds Danie ’n bespreking gefasiliteer oor gedagtes hoe om meer van ons lidmate by evangelisasie te betrek. Die Pinksterfees is afgesluit met die erediens op die Sondag wat ook gelei is deur ds Danie Murray. Ons kon regtig hierdie naweek die warmte ervaar wat gesprekke met medelidmate oor die uitstorting van die Heilige Gees teweeg gebring het. Die verrigtinge was ’n heerlike belewenis! Volgende jaar maak ons DV weer so!

Gereformeerde Kerk Pretoria-Annlin Naam Van Tel Nommer Eposadres Aantal persone Saterdag 4 Junie Dien in

GEREFORMEERDE KERK PRETORIA-ANNLIN Nuus   Weeklikse Gemeente-nuusblad Die Fontein (klik op die foto vir Die Fontein) 2021 Begin met inperkings op eredienste Teen die einde van 2020 het ons Staatspresident aangekondig dat die land weer op Vlak 3 ingeperk gaan word as gevolg van die Covid19 pandemie. Dit raak ons gemeente direk in soverre fisiese byeenkomste vir die eerste twee weke in Januarie 2021 verbied word. Gelukkig het die Here ons die tegnologie voorsien om ons eredienste te kan uitsaai. Dit word d.m.v. twee mediums gedoen, nl. Video uitsending via Youtube. Die skakel https://www.youtube.com/channel/UC4NmYnuAd0293vFhf1i-tpg kan hiervoor gebruik word.  Klank uitsending via Kerkdienstgemist vir inluisteraars wat nie oor soveel data beskik om op die video uitsending in te skakel nie. Hierdie medium gebruik maar sowat 15 Megagrepe data. Die skakel vir Kerkdienstgemist is https://kerkdienstgemist.nl/stations/1246-Gereformeerde-Kerk-Pretoria-Annlin Ons wil graag sien dat die erediens uitsendings toeganglik is vir al ons lidmate. Lidmate wat nie oor die nodige apparaat of data beskik nie kan met die gemeente se Diakonie skakel. Jy kan eenvoudig die e-pos vormpie by Kontakbesonderhede invul en jou versoek sal na die Diakonie vir verdere aandag verwys word.  Pinksterviering 2021 Vanjaar se Pinksterviering het op Saterdag 22 Mei begin met 'n seminaar via Zoom, wat gehandel het oor die Westerse- en tradisionele Afrika denke. Beide hierdie wêreldbeskouings kan jou verhinder om in 'n persoonlike verhouding met God te leef. God se Gees het dan nodig om jou denke te verander. Ds Johannes Aucamp was die spreker. Vir diegene wat hierdie besondere seminaar misgeloop het, is daar goeie nuus. Die praatjie is opgeneem en kan weer na geluister word deur op die volgende skakel te kliek. https://youtu.be/-mga_NqTj1E Die Pinksterviering is op Sondag 23 Mei voortgesit met 'n erediens wat ook deur ds Johannes waargeneem is. Ds Johannes het eers die gemeente 'n kort oorsig gegee oor TOPIA (Training of Pastors in Africa) en toe gepreek oor die uitstorting van die Heilige Gees. Die Pinksterviering is afgesluit met 'n gesamentlike Engelse erediens wat waargeneem is deur dr Brian De Vries. Die Susters bederf die Seniors Lekker saamkuier deur ons Seniors Na byna twee jaar van geen aktiwiteite nie was daar op Saterdag 6 November ‘n uithaler fees gereël vir die Seniors van die Gereformeerde kerk Pretoria-Annlin. Die Susters van die gemeente het geen moeite ontsien om die Seniors baie spesiaal te laat voel nie, en die feestelik gedekte ronde tafels, met die pragtige blomstukke in die middel, het dadelik die aandag  getrek met die instap in die saal.  Hiervoor was Deon en Elize Schlunz verantwoordelik. ‘n Geskenkie , ‘n vetplantjie in ‘n mooi versierde potjie, is vir almal teenwoordig op die tafel gesit. Smaaklike skaaptjops, pap en sous en heerlike wortelslaai is voorgesit.  Sjokolade mousse en roomys het die ete afgerond. Die seniors wat in groot getalle opgedaag het was uitgehonger vir saamkuier en het lank na hul klaar geëet het nog gesit en gesels.   Ons stem heelhartig saam met br Koos Botes  dat  geleenthede soos hierdie die gemeente opbou. ‘n Hartlike woord van dank aan die susters wat van hierdie geleentheid so ‘n groot sukses gemaak het. 2 e Handse Goedereverkopings weer op volle spoed Na die opheffing van die Covid19 inperkings is die tweedehandse goedereverkopings weer mooi op dreef. Daar is aan die begin van April en Mei 2021 verkopings gehou en sover is daar bykans R6000.00 ingesamel en 29 bybels verkoop. Aan God alleen die eer! Die fondse word aangewend om weer nuwe bybels te koop wat tydens die verkoping teen 'n nominale bedrag van R20.00 per bybel van die hand gesit word. Bybels is in al ons landstale beskikbaar en ook in die Zimbabwiese Shona taal. Saam met die bybels word Heidelbergse Kategismusboekies gratis uitgedeel. Op hierdie wyse is die verkopings tegelyk ook 'n evangelisasieprojek. Die diensgroep bestaan uit 'n aantal flukse lidmate wat hard werk om eerstens die goedere uit te sorteer en te prys en om dit daarna tydens die verkopings uit te stal en te verkoop. In die winter is dit nog donker wanneer die verkoping om 6vm begin.  Indien julle meer wil weet oor die diensgroep of hierby wil aansluit, besoek asb die diensgroep se webblad by /diensgroepe . Uitreik na Hospi-taalpersoneel Die Vrouebedieningsgroep van ons gemeente het, nadat hulle vir die hospitaalpersoneel van Eugene Marais Hospitaal gebid het, na hulle uitgereik deur vir hulle kitssop, jaffles en koekies te bring. Dit is met groot dankbaarheid in ontvangs geneem. Die gesondheidswerkers by ons hospitale werk onder geweldige druk a.g.v. die Covid19 pandemie. Bid asb elke dag vir hulle. Gesondheidswerkers baie bly met hul kitssop Die Heidelbergse Kategismus vertaal in Lomwe Ons gemeente het sowat 'n jaar gelede die Heidelbergse Kategismus in Lomwe laat vertaal. Lomwe is die Afrika taal wat in die Zambezia Provinsie van Mosambiek gespreek word. Die bybel is so 'n paar jaar gelede in Lomwe vertaal en dieselfde vertaalspan het nou vir ons gemeente die Heidelbergse Kategismus vertaal. Pastor Adolfo Mario van Milange het sowat 'n maand gelede na Nampula gereis waar hy die hele Heidelbergse Kategismus in 'n klankateljee voorgelees het om 'n Lomwe klankopname van die kategismus te maak.  Ons gemeente wil nou graag die bybel en daarmee saam die Heidelbergse Kategismus se oudio opnames op 20 klankbybel instrumentjies laat laai en die instrumentjies vir gemeentejies in die Zambezia Provinsie skenk. Die mense is oorwegend ongeletterd maar het 'n besonderse vermoë om goed te kan luister. Ongeveer 30 mense kan gelyktydig na een so 'n klankbybel instrumentjie, wat met sonkrag herlaai word, luister. Bid asb vir hierdie projek dat God se Woord en gepaardgaande Heidelbergse Kategismus toeganklik sal raak vir hierdie mense wat nie kan lees en skryf nie.  Die rooi roete dui die pad aan wat hulle gery het vanaf Milange na Pebane Ds Giepie en die kinders van Tezeze Vir 'n terugblik op 2020 se nuus, klik hier Drie predikante reis eersdaags na Mosambiek Vanjaar sou 'n groot groep van 10 lidmate Mosambiek besoek het, maar dit moes uitgestel word vanweë die Covid 19 pandemie. Nou is dit slegs drie dominees (ds Giepie, ds Paul Modise van Gereformeerde Kerk Kagiso en ds Danie Murray van Kaapstad) wat nog gaan. Ds Paul is een van die GKSA se deputate vir Ekumenisiteit. Die drie dominees beoog om op 2 Julie te vertrek en ds Danie sal hulle met sy bakkie van Kaaptad kom oplaai. 'n Vergadering met die Tumbine Sinode van die Gereformeerde Kerk in Noord-Oos Mosambiek word in die vooruitsig gestel. Na die vergadering sal die Moderator en Sekretaris van die Tumbine Sinode DV vir  hulle vergesel na die Pebane en Ribaue gemeentes waar hulle die kerkleiers sal toerus in onder andere dissipelmaking. Di Giepie en Paul sal DV op 14 Julie weer terugvlieg vanaf Nampula waarna ds Danie op sy eie verdere sendingreise gaan onderneem. Lg sal DV eers weer teen die einde van Julie terugkeer.  Vordering met Mosambiek Uitreik Ds Giepie het op Vrydag 2 Julie saam met ds Paul Modise en ds Danie Murray met lg se voertuig na Mosambiek vertrek. Gelukkig het die Regering se strenger Covid19 maatreëls slegs reise in- en uit die Gauteng provinsie vir ontspanningsdoeleindes verbied en kon ons dominees met permitte in die hand die Gauteng provinsie verlaat. Al drie het ook gelukkig negatief getoets vir die virus en met sertifikate in die hand kon hulle oor ons landsgrens reis. Ons dank die Here dat Hy hierdie deur vir hulle oopgemaak het. Dit het 4 dae geneem om die ongeveer 2300km rit na Milange te onderneem. Die pad was op plekke baie sleg maar hulle is sonder enige teëspoed daardeur en het Maandagaand in Milange aangekom. Dinsdag is daar met verteenwoordigers van die Tumbine Sinode (Sinode van die Gereformeerde Kerk in Noord-oos Mosambiek) gesprek gevoer. Die gesprek het tot in die aandure aangehou en het in ‘n mooi en liefdevolle gesindheid plaasgevind. Die Sinode het die Memorandum van Verstandhouding onderteken waarvolgens ons gemeente hulle sal help om een van hulle dominees vir tye van die jaar na onbereikte gebiede te stuur om die Evangelie te gaan verkondig. Die Sinode was ook baie opgewonde oor die 20 oudio bybels wat ds Giepie geskenk het omdat hierdie instrumentjies, benewens die Bybel in Portugees en Lomwe ook die Heidelbergse Kategismus in Lomwe opgelaai gehad het. Die vertaling van die kategismus in Lomwe was een van ons gemeente se projekte. Woensdag het ds Giepie hulle by die Tezeze gemeente in die Milange omgewing aangegaan om daardie gemeente toe te rus en teen die tyd wat die nuusbrief op Donderdag gefinaliseer moes word, was ons drie dominees tesame met die Moderator en Sekretaris van die Sinode nog op pad na die Kusdorp Pebane. Sien rooi roete op kaart. Ons is dankbaar teenoor die Here dat hulle reise en werk tot nou toe nog voorspoedig en geseënd was en ons bid dat dit vir die res van die uitreik ook so mag wees. Ds Giepie en ds Paul vlieg DV op 14 Julie vanaf Nampula terug na Suid Afrika en ds Danie sal voortgaan met werk tot einde Julie wanneer hy DV alleen met sy voertuig sal terugkeer.